• Grünert Matthias

Co vegn la lingua emprendida d’uffants pitschens? Co emprendan uffants pitschens pliras linguas en situaziuns dal contact linguistic? Co vegn la lingua dada vinavant dad ina generaziun a l’autra? Tge rolla giogan la famiglia e la scola en quest process? Co vegn il rumantsch emprendì da scolaras e scolars che han in’autra emprima lingua ch’il rumantsch?

En l’acquisiziun da la lingua tar uffants pon ins constatar ina logica generala dal svilup, malgrad la gronda variabilitad da las structuras da las differentas linguas. Davart l’acquisiziun dal rumantsch tar uffants èn ins pir vidlonder da far retschertgas, en in project che vegn realisà en Val Tujetsch (http://www.acqdiv.uzh.ch/en.html > Tuatschin).
La transmissiun dal rumantsch en famiglia percunter è in tema perscrutà dapi ils emprims studis da la sociolinguistica rumantscha. Quai ha da far cun l’interess per la vitalitad dal rumantsch sco lingua minoritara. I dat fin ussa surtut datas quantitativas che mussan tendenzas tenor ina tscherna da facturs ed anc strusch analisas dal cumportament da las persunas en las famiglias.
Las cumpetenzas dal rumantsch en scola èn vegnidas perscrutadas en differents projects, ed en quest connex èn ins era s’interessà per scolaras e scolars cun differentas linguas da famiglia. Uschia èn vegnids documentads aspects da l’acquisiziun dal rumantsch sco secunda lingua tar uffants.

Sper la litteratura davart il rumantsch studegiain nus publicaziuns da linguistica generala per ils aspects anc betg tractads en connex cun il rumantsch. Las enconuschientschas acquistadas tras il studi da la litteratura duvrain nus per analisar cas concrets, nua ch’il rumantsch è involvì e che participantas e participants dal seminari pon era documentar sezs.

Las participantas ed ils participants...
– enconuschan la litteratura sociolinguistica che tracta la transmissiun dal rumantsch e l’acquisiziun dal rumantsch en scola,
– èn sa famigliarisad(a)s, tras publicaziuns pli novas, cun descripziuns da facturs che determineschan la transmissiun da linguas,
– san applitgar las noziuns acquistadas tras il studi da la litteratura a cas concrets, nua ch’il rumantsch è involvì.

Cathomas, Regula 2008: Sprachgebrauch im Alltag. Die Verwendung des Rätoromanischen in verschiedenen Domänen: Wechselwirkungen und Einflussfaktoren, Chur: Bündner Monatsblatt

Kristol, Andres Max 1984: Sprachkontakt und Mehrsprachigkeit in Bivio (Graubünden). Linguistische Bestandesaufnahme in einer siebensprachigen Dorfgemeinschaft, Bern: Francke

Lambert, Brigitte E. 2008: Family Language Transmission. Actors, Issues, Outcomes, Frankfurt a.M. etc.: Lang

Peyer, Elisabeth et al. 2014: Projektbericht des SNF-Projekts „Empfehlungen für Basisstandards für die Schulsprachen der Rätoromanen“, Freiburg/Fribourg, http://doc.rero.ch/record/232464?ln=fr

Weinreich, Uriel 2011: Languages in Contact. French, German and Romans in twentieth-century Switzerland. With an introduction and notes by Ronald I. Kim and William Labov, Amsterdam/Philadelphia: John Benjamins

Evaluaziun sin basa d'in referat e sin basa da la participaziun a las discussiuns en il seminari.