• Grünert Matthias

Las participantas ed ils participants sa famigliariseschan cun las differentas normas da la lingua che valan, tut tenor co ch’il pledader/la pledadra sa posiziunescha sin las axas da la variaziun linguistica (geografic, social, situativ, oral/scrit). En vista da la redacziun da texts academics vegnan las participantas ed ils participants sensibilisads per las sorts da texts che stattan a disposiziun, per la tscherna dal stil e per strategias da la chapibilitad. Ultra da quai vegnan la planisaziun, la redacziun e la valitaziun da lavurs da seminari tematisadas.

Aspects grammaticals e dal stgazi da pleds vegnan tractads sin basa da las grammaticas per la scola sco era da recumandaziuns da linguistAs. Las normas prescrittas u cussegliadas en questa litteratura vegnan discutadas criticamain. Las participantas ed ils participants daventan cun quai pli conscients da las differenzas tranter las normas dal diever e las normas prescriptivas e sviluppan lur capacitad da tscherner ils meds d’expressiun adequats.

Durant il semester vegnan scrits texts pli curts. En l’ultima emna dal semester inoltreschan las participantas ed ils participants in palpiri da tesas, en il qual els ston ademplir las pretensiuns dal scriver academic ch’els han emprendì durant il semester.

Las participantas ed ils participants elegian sezs la varietad rumantscha per ils exercizis da redacziun.

Las participantas ed ils participants...

– san distinguer sorts da texts e tscherner ils meds d’expressiun adequats persuenter,

– san leger criticamain e trair a niz las prescripziuns e recumandaziuns per il diever dal rumantsch,

– han meglierà lur enconuschientscha dals meds disponibels sin ils nivels da l’organisaziun textuala e da la sintaxa sco era lur cumpetenza lexicala per rediger texts da caracter academic,

– enconuschan ils criteris per la redacziun e la valitaziun da lavurs da seminari.

Evaluaziun sin basa dals pensums durant il semester e d’in palpiri da tesas ch’è dad inoltrar en l’ultima emna dal semester.