• Grünert Matthias

Tge caracteristicas distinguan la lingua discurrida da la lingua scritta ch’è stada privilegiada per lung temp en la linguistica? Tge variaziun tranter lingua caracterisada sco discurrida e lingua caracterisada sco scritta pon ins percorscher en ils meds da massa tradiziunals (pressa, radio, televisiun) ed en furmas da communicaziun liadas a las medias novas (sms, chat, servetschs online)?

Per savair descriver quests dievers da la lingua actuala sa famigliariseschan las participantas ed ils participants cun las noziuns fundamentalas da la linguistica da las varietads. En il studi da la lingua discurrida dal mintgadi sco er da chats vegnan er l’analisa e la linguistica conversaziunala applitgadas, che s’interesseschan per l’organisaziun da conversaziuns, per la constituziun dal senn en l’interacziun e per atgnadads linguisticas da conversaziuns. Per l’interpretaziun da facturs specials en la communicaziun dals meds da massa vegnan concepts da la linguistica da las medias integrads. Las participantas ed ils participants emprendan d’enconuscher ultra da quai ils princips per rimnar e preparar datas oralas per l’analisa.

Suenter la part teoretica suonda ina part d’analisas, nua che participantas e participants examineschan producziuns oralas ch’els han rimnà sezs, emissiuns da radio u televisiun u conversaziuns da chat.

Las participantas ed ils participants...

– enconuschan las noziuns fundamentalas da la linguistica da las varietads e las san applitgar per caracterisar texts e producziuns oralas,

– san analisar conversaziuns tenor ils criteris da l’analisa e la linguistica conversaziunala,

– èn sa famigliarisads cun facturs specials da la communicaziun en ils meds da massa,

– san applitgar las normas dal Gesprächsanalytisches Transkriptionssystem (GAT) per transcripts da basa.

Il seminari ha lieu online via Teams almain fin a la pausa da Pasca.

Evaluaziun sin basa d'in referat e sin basa da la participaziun a las discussiuns en il seminari.